پنجابی سنگت پاکستان
تنقیدی اجلاس
تاریخ: 20 نومبر 2010
ویلا: 5 وجے شام
تھاں: پنجابی کیفے، پنجابی کمپلیکس، 1-قذافی سٹیڈیم لاہور
کارروائی اجلاس:
پنجابی سنگت پاکستان دا تنقیدی اجلاس ڈاکٹر سعید الفت ہوراں دی صدارت وچ ہویا۔ ایس اجلاس دے اچیچے پروہنے اقبال راحت سن۔اجلاس دے شروع وچ سیکرٹری پنجابی سنگت پاکستان یوسف پنجابی نے سنگت دے الیکشن بارے گل کردیاں دسیا کہ اگلے سال نومبر وچ ای سنگت دے سیکرٹری تے جنرل سیکرٹری لئی الیکشن ہوون گے۔ ایس توں بعد پنجابی سنگت پاکستان دے جوائنٹ سیکرٹری رضوان بھٹی نے پچھلے اجلاس دی کاروائی پڑھ کے سنائی جیہڑا زبیر رانا ہوراں دی یاد وچ رکھیا گیا سی۔ اقبال قیصر ہوراں نے سنگت وچ اپنا مضمون تنقید لئی پڑھیا جیہڑا ڈاکٹر نوید شہزاد دی اک ان چھپی کتاب دے حوالے نا ل سی۔ ایس مضمون وچ چندر چیٹرجی دا خطاب جیہڑا اوہناں مادری زباناں دے حوالے نال کیتا سی تے پیسہ اخبار دا اوہدے تے ردِعمل موضوع بنایا گیا سی۔ مضمون وچ مضمون نگار نے برصغیر وچ پنجابی تے اردو زبان دی تاریخ تے ایہناں زباناں تے مذہبی اثرات دے حوالے نال گل کیتی تے اخیر وچ سکرپٹ یا لپی دے حوالے نال کجھ تجویزاں پیش کیتیاں۔مضمون تے تنقیدی گل بات شروع کردیاں ہویاں نصیراحمد ہوراں آکھیا کہ سب نالوں پہلے تے رسم الخط یا لپی دے نام دی درستگی ہونی چاہیدی اے۔ رسم الخط یاں لپی دے تواریخی پچھوکڑ بارے جانکاری دتی تے مضمون نگار دی تجویز نوں رد کردیاں ہویاں آکھیا کہ ایس بحث وچ اگے اے اسیں بڑا ویلا ضائع کیتا اے۔ اوہناں آکھیا کہ دنیا دی کوئی لپی وی بولی جان والی زبان دا پورا اُچارن نہیں کردی۔بجائے گورمکھی لپی دے سانوں اپنی لپی وچ ای موجود مسئلیاں نوں حل کرنا چاہیدا اے۔ پروفیسر عاشق رحیل ہوراں آکھیا کہ گورمکھی وچ بہت سارے مسئلے نے جیویں ساڈی لپی دے وکھرے وکھرے لفظاں لئی گورمکھی کول اکو ای اکھر ہے۔ ایس لئی سانوں شاہ مکھی لپی نوں ای بہتر کرنا چاہیدا اے ۔ ثناور چدھڑ ہوراں زباناں دے مہذب یا غیر مہذب ہون تے فورٹ ولیم کالج دی تاریخ دے حوالے تے گل بات کیتی تے مادری زبان دے حوالے نال ساڈے ذاتی رویاں نوں نندیا۔نیاز نجمی ہوراں آکھیا کہ پنجابی دے بوہت سارے لہجے نے نے تے کجھ لوک لہجیاں دی وجہ توں دوجیاں نوں کمتر سمجھدے نیں۔ سانوں ایہناں ساریاں گلاں نوں بھل کے اپنی بولی واسطے کم کرنا چاہیدا اے۔آفتاب جاوید ہوراں مضمون تے گل کردیاں ہویاں آکھیا کہ مضمون دی زبان بوہت اعلٰی سی ۔ اوہناں آکھیا کہ زبان دی ترقی لئی زبان دے دامن نوں کھلا ہونا چاہیدا اے۔ سانوں ساریاں زباناں توں لینا چاہیدا اے۔اگر اسیں پنجابی دے حوالے نال آن والے ویلے لئی جے کجھ طے کرنا اے تاں سانوں اپنا ویژن وڈا رکھنا ہووے گا۔جیہڑے مسئلے ساڈے سامنے ہے نیں اوہ سانوں بجائے کسے دا انتظار کرن دے آپ ای وڈیاں بن کے رل بہہ کے حل کر لینے چاہیدے نے۔نصیر احمد ہوراں آکھیا کے قرآن وچ وی اے کہ پنجابی پڑھیا کرو۔اک آیت دے حوالے نال اوہناں دسیا کہ حکم اے کہ اپنی شناخت اپنے قبیلیاں دے حوالے نال قائم رکھو تے قبیلیاں دی شناخت اپنیاں بولیاں نال ہوندی اے۔اجلاس دے صدر ڈاکٹر سعید الفت ہوراں سب دی رائے نوں سلاہیا تے مضمون دی تعریف کیتی۔ایس توں بعد گلام شبیر ہوراں اپنی کہانی ‘‘کویلا’’ دے سرناویں نال پیش کیتی۔ کہانی تے گل بات شروع کردیاں ثناور چدھڑ ہوراں آکھیا کہ کہانی دی زبان چنگی اے تے کہانی کار نوں اپنے الفاظ دے استعمال تےسٹائل اتے مکمل کمانڈ حاصل ہے پر کہانی اپنے سرناویں نوں نبھان وچ ناکام رہی اے۔پروفیسر عاشق رحیل ہوراں آکھیا کہ کہانی وچ کوئی وضاحت نہیں ہے۔ کہانی دے وچ تشنگی رہ گئی اے۔ اقبال قیصر ہوراں کہای تے گل کردیاں ہویاں آکھیا کہ سرناواں کہانی نال میل ضرور کھا رہیا اے پر کہانی کار کویلا ثابت نہں کر سکیا۔ ایہہ کہانی ڈر، خوف تے بھے دی ای۔ کہانی نوں جس طرحاں ختم کیتا گیا اے اس نال سارا رولا پے گیا اے۔نصیر احمد ہوراں آخھیا کہ کہانی کار جیہڑی گل ویکھ نہیں سکدا اوہ بیاں کیوں کر رہیا اے۔وضاحت وی نہیں ملدی کہانی وچ۔ زمان و مکاں دی ترتیب وچ وی کجھ فرق اے۔ کہانی تشنگی چھڈ گئی اے۔ ثناور چدھڑ ہوراں آکھیا کہ ایبسٹریکٹ آرٹ دا تجربی فنون لطیفہ دی ساریاں صنفاں وچ ہونا چاہیدا اے۔ آفتاب جاوید ہوراں آکھیا کہ تجریدی آرٹ دا خالق اپنے دل دی گل کردا اے پر جدوں اک منظر بیاں کیتا جاندا اے تے فیر اوہ تجرید نہیں رہ جاندا۔منظر دی جزیات دا عقل، شعور تے منطق نال تعلق ہونا چاہیدا اے۔ تخلیق کار نوں چاہیدا اے کہ اوہ تنقید دی روشنی وچ بہتری لیاون۔ یوسف پنجابی ہوراں آکھیا کہ کہانی سوہنی تے من کھچویں اے پر اخیر تے کچی کندھ وانگوں ڈھے جاندی اے۔ایس توں بعد ایم آر مرزا ہوراں اپنی نظم سنائی جیہدا سرناویں سی ‘‘دل دی ہواڑ’’ ۔ نظم تے گل بات شروع کردیاں ہوئیاں اقبال قیصر ہوراں آکھیا کہ ایہہ نظم قصہ کہانی دی روائتی شاعری ای اے ۔ وقت دا رونا، عوام دے مسائل دا رونا عوام دے کرب دا رونا سب پرانا انداز اے۔ ایہدے وچ نویں شاعری دے تجربات گھٹ نیں۔ اج دی شاعری دے حوالے نال ایہہ صدیاں پرانی نظم اے۔ ثناور چدھڑ ہوراں آکھیا کہ ایہہ بوہت چنگی نظم اے ۔ علامہ صاحب دے شکوے نالوں تے چنگی اے۔ نصیر احمد ہوراں آکھیا کہ شاعری دیاں اپنیاں ضرورتاں وی نیں جیہڑیاں پوریاں نہیں کیتیاں گئیاں، ایہہ نظم ذمہ داری نال نہیں لکھی گئی۔ نظم وچ مضبوطی تے جڑت نہیں ہے۔ عدل منہاس لاہوری ہوراں آکھیا کہ نظم وچ کچا پن اے۔ صدر محفل ڈاکٹر سعید الفت ہوراں آکھیا کہ شاعر جیویں جیویں لکھن گے اوویں اوویں نکھرن گے۔اجلاس دے اخیر وچ اقبال راحت ہوراں قربانی دے حوالے نال اپنی نظم سنائی۔
جوائنٹ سیکرٹری جنرل سیکرٹری صدر
No comments:
Post a Comment