In the memory of Zubair Rana زبیر رانا دی یاد وچ

 پنجابی سنگت پاکستان

اجلاس

 تاریخ: 13 نومبر 2010                 ویلا: 5 وجے شام                                                                                                                            تھاں: پنجابی کیفے، پنجابی کمپلیکس، 1-قذافی سٹیڈیم لاہور

کارروائی اجلاس:

پنجابی سنگت پاکستان دا پہلا اکٹھ الطاف قریشی ہوراں دی صدارت وچ ہویا۔ ایہہ اکٹھ پنجابی سیوک تے پنجابی گیتاں دے خالق زبیر رانا ہوراں دی یاد وچ سی۔ اکٹھ دے شروع وچ پنجابی سنگت پاکستان دے سیکرٹری یوسف پنجابی نے پنجابی سنگت پاکستان دے اغراض و مقاصد تے سنگت بارے جانکاری دتی۔ اجلاس دے شروع وچ اقبال قیصر ہوراں بولدیاں آکھیا کہ کہ زبیر رانا نوں اک سیاسی کارکن دی تے کالم نگار دی حیثیت نال جانیا جاندا اے پر اوہنا دی حیاتی دا دوجا پکھ پنجابی کامے اتے پنجابی شاعر ہون دا وی اے تے ایہہ اکٹھ ایسے پکھوں ای اوہناں نوں یاد کرن لئی اے۔ ایس توں بعد رانا ہوراں دے گیت جو وکھو وکھ گلوکاراں گائے سن اوہ سنائے گئے۔ایس مگروں مرتضیٰ تاثیر  نے زبیر رانا نال جڑیاں ہوئیاں یاداں اکٹھ نال سانجھیاں کیتیاں۔ اوہناں دسیا کہ جنگ اخبار جہدے منشور وچ لکھیا اے کہ ایہہ اخبار اردو زبان دی پروموشن واسطے اے پر ایس اخبار وچ جون 1984 وچ زبیر رانا ہوراں نے پنجابی شہ سرخیاں لائیاں جیہڑیاں کئی دن چھپدیاں رہیاں تے زبیر رانا نے جنگ نوں پنجابی کر دتا۔ایس مگروں شاہدہ جبیں ہوراں زبیر رانا  نوں پارٹی ورکر توں ہٹ کے اک پنجابی کامے دے طور تے یاد کیتا۔اوہناں نے کہیا کہ جیڈی وڈی اوہ سیاسی سوجھ والا بندہ سی اونا ای وڈا اوہدے اندر پنجابی سی۔ اوہنے پنجابی بچیاں واسطے پنجابی وچ  پہاڑے تیار کیتے تے اوہناں نوں گیتاں دے روپ وچ گوایا وی۔ شاہدہ جبیں ہوراں مگروں ریاض دانشور نے زبیر رانا جی دی پنجابی زبان دی خدمت  تے طبقاتی جدوجہد دے حوالے نال اپنے وچار سانجھے کیتے۔ ایس مگروں موسیقار ماسٹر لطیف ہوراں کہیا کہ میں اوہناں دے پنجابی گیت کمپوز کیتے تے گوائے۔ اوہناں دے گیتاں دی مٹھاس تے کمپوزیشن وچ اوہناں دی دلچسپی توں پتہ لگدا اے کہ اوہ موسیقی نال کنے جڑے ہوئے سن۔ اوس توں بعد صابر علی صابر نے امیر جماعت اسلامی مولوی منور حسین  دا پیغام پڑھ کے سنایا۔ ایس توں بعد پنجاب ٹیچرز یونین دے عہدیدار تاج حیدر ہوراں اپنی گل بات اکٹھ نال سانجھی کیتی۔ پنجابی دے نامور لکھاری تے صحافی تنویر ظہور ہوراں زبیر رانا جی دی سیاسی سوجھ بارے گل کیتی تے اوہناں دے پنجابی کامے ہون دی سانجھ تے بھرواں چانن پایا۔ ایس توں بعد رضوان بھٹی جوائنٹ سیکرٹری پنجابی سنگت پاکستان نے راولپنڈی توں مشہور عالم نثار ترابی دا پیغام پڑھ کے سنایا تے نسرین انجم بھٹی ہوراں نال افسوس دا اظہار کیتا۔ ایس توں بعد پیپلز پارٹی دے عہدیدار سہیل ملک ہوراں زبیر رانا ہوراں دی سیاسی سوجھ تے دانشوری اُتے بھرویں گل بات کیتی۔ ڈاکٹر کنول فیروز ہوراں بطور گاڈ فادر گل بات کیتی تے کہیا کہ نسرین تے زبیر دا ویاہ میں کروایا تے اج تیکر ایہہ میرے دھی جوائی نے۔ جدوں کہ زبیر نوں میں پتر بنایا سی۔ ایہہ اک محبت دا رشتہ اے جیہڑا کدے ختم نہیں ہو سکدا۔ گھٹو گھٹ ساڈے ساہواں تیکر۔اوہناں نے رانا جی ہوراں دی حیاتی تے ویاہ بارے گل بات کیتی۔ ایس مگروں ڈاکٹر صغرا صدف ہوراں کہیا کہ میں جدوں پی۔ایچ۔ڈی کر رہی ساں تے ایہہ میرے پرائیویٹ گائیڈ سن ۔ زبیر رانا ہوراں ایہہ تھیسس مینوں پوری جدوجہد نال کروایا تے میری رہنمائی کیتی۔ ایس حوالے نال میں اوہناں نوں اپنا استاد مندی ہاں۔ ایس توں بعد وزیر اعظم پاکستان دا پیغام وجے آرنٹ ہوراں پڑھ کے سنایا۔ وزیراعظم یوسف رضا گیلانی ہوراں پنجابی سنگت پاکستان دے ایس اچیچے اکٹھ واسطے اپنا اچیچا پیغام بھیجیا جیہدے وچ اوہناں زبیر رانا ہوراں دی خدمات نوں سراہیا تے اوہناں دی موت نوں اک وڈا نقصان قرار دتا۔ زبیر رانا ہوراں دی بیگم پنجابی دی مہان شاعرہ نسرین انجم بھٹی ہوراں ایس موقعے تے اپنا خاص مضمون پڑھیا جہدے وچ اوہناں نکاح نامے نوں موضوع بنایا تے ایس نکاح نامے نوں پوری حیاتی دا بندھن دسدیاں ہویاں کہیا کہ اسیں دونویں کیتے ہوئے ایس مذہبی تے قانونی معاہدے اُتے آخری دم تک پکے رہے آں تے ہن اگے قبراں وچ وی پکے رہواں گے۔ایس موقعے تے اوہناں دیاں اکھاں اتھرواں نال بھر گئیاں تے اکٹھ دا سارا ماحول سوگوار ہو گیا۔ اخیر وچ اجلاس دے صدر الطاف حسین قریشی نے ایہہ کہہ کے اک واری فیر ماحول نارمل کیتا کہ زبیر کوئی ایہو جہیا بندہ نہیں سی کہ اوہدی موت اتے رویا جاوے ۔ اوہ ساری زندگی پچھڑے ہوئے  طبقیاں نوں ہساندا رہیا تے اوہناں وچوں سوجھ پیدا کرن دی کوشش کردا رہیا۔ اجیہا بندہ جیہنے ہاسے ونڈے ہون اوہنوں رونا نہیں چاہیدا بلکہ اوہدے کم نوں اگے لے کے ٹرنا چاہیدا اے۔ زبیررانا نال محبت تے اوہدی یاد ایہو ای اے کہ اسیں اوہدی سیاسی جدوجہد تے اوہدی پنجابی زبان نال جڑت نوں قائم رکھیئے تے اوہدے مشن نوں لے کے اگے ٹریئے۔ ایس اکٹھ وچ 70 دے قریب لوکاں نے رلت کیتی جیہناں وچ ڈاکٹر دلشاد ٹوانہ، علامہ شریف صابر، راو طارق لطیف، شمیم اختر، خاقان حیدر غازی، ڈاکٹر کے۔ ایس بٹالوی، فراست بخاری، اعظم توقیر، سیف الملوک سیفی، رانا صبور خان، سلیم راٹھور، یاسین یاس تے ہور بہت سارے اُگھڑویں ناں شامل سن۔

جوائنٹ سیکرٹری                جنرل سیکرٹری                            صدر