04-12-10 Parveen Sajjal di Shaieri Bary Gal Baat.

پنجابی سنگت پاکستان
اجلاس
تاریخ: 4 دسمبر 2010     ویلا: 5 وجے شام
تھاں: پنجاب کیفے، پنجابی کمپلیکس، 1-قذافی سٹیڈیم لاہور

Yousaf Punjabi (Secretary Punjabi Sangat Pakistan)

Rizwan Bhatti (Joint Secretary Punjabi Sangat Pakistan)

Iqbal Qaisar

Jameel Ahmad (Academy of Letters Pakistan) presenting flowers to Parveen Sajjal

Aftab Javed presenting flowers to Parveen Sajjal

Aftab Javed

Shehnaz Muzammal

Iqbal Qaisar

Yousaf Sindhi

Tasneem Tassaduq

Saleem Rathore, Saiful Malook Saifi and Niaz Najmi

کارروائی اجلاس

 پنجابی سنگت پاکستان نے 4 دسمبر 2010 نوں شام 5 وجے پنجاب کیفے پنجابی کمپلیکس، 1۔ قذافی سٹیڈیم، لاہور وچ اردو تے پنجابی دی شاعرہ تے صحافی پروین سجل ہوراں دی شاعری تے گل بات لئی اک اکٹھ رکھیا۔ پروگرام دی صدارت محترمہ شہناز مزمل ہوراں کیتی۔ پروہنیاں وچ پروین سجل، شفیق سلیمی تے سندھی ادبی سنگت دے پچھلے سیکرٹری یوسف سندھی شامل سن۔ پروگرام دے شروع وچ اکادمی ادبیات پاکستان ولوں ریذیڈنٹ ڈائریکٹر جمیل احمد تے پنجابی سنگت پاکستان ولوں آفتاب جاوید ہوراں پروین سجل ہوراں پھُل پیش کیتے۔ پروین سجل ہوراں دا تعارف کرواندیاں ہویاں سیکرٹری پنجابی سنگت یوسف پنجابی ہوراں دسیا کہ پروین سجل اردو تے پنجابی دی شاعرہ ہوون دے نال نال بہت چنگی صحافی وی نیں۔ ایہہ ماہنامی لیڈی رپورٹ دی چیف ایڈیٹر نیں تے اوہناں دے ادبی کم بارے دسیا کہ ایہناں نے مولانا مناظر احسن گیلانی دا پنجابی ترجمہ کیتا اے ، 2007 وچ ایہناں دا شعری مجموعہ ''ممکن'' چھپیا۔ ایہناں 30ویں سپارے دا منظوم ترجمہ وی کیتا اے۔ ایس توں بعد پروین سجل ہوراں نوں شاعری سناون دی فرمائش کیتی گئی۔ اوہناں اپنا کلام سنا کے بھرویں داد لئی۔

روز کُٹ کے چوریاں پئی کھاواں
منجی پُٹھی تے کدی میں سدھی پاواں
جے کر رانجھڑا رتھ سوار آوے
کھنڈ گھول کے دُدھ سبیل لاواں

اکھیاں سفنا وانگ خلیل
روز نہیں جمدے اسماعیل
اگ گلزار ایویں نہیں بندی
عشق گلابی پنڈا نیل
سالک دے لئی بھید دلیل
منہ چُک ویکھے عزرائیل

چُلھا چونکا دھرنا کیہ اے
سکھنی ہانڈی سڑنا کیہ اے
بھُکھ طلب توں جُثہ فارغ
میں کیہ جاناں مرنا کیہ اے

رکھ اگے قد آدم شیشہ صورت الف کھلوتی
رب نوں اپنے گھریں بُلا کے دتی اج چنوتی
ویکھ کے ایس تن سرکنڈے اڈی اُچی کیتی
اج میں اپنے عیباں دے نال موڈھا جوڑ کھلوتی

شاعری سنن توں بعد گل بات شروع کردیاں ہویاں آفتاب جاوید ہوراں آکھیا کہ اج پروین دی شاعری سنن ویلے میں بہت ساریاں حیرتاں وچ سی۔ مینوں صوفی شاعراں نوں پڑھ کے جو لطف آندا سی اوہ اج پروین دی شاعری سن کے آیا اے۔ ایہہ ساریاں گلاں روح تے محبت نال کیتیاں گئیاں نیں۔ محبت تے روح اک لمحے وچ پوری کائنات پھرا دیندی اے۔ نماز مومن دی معراج آکھی گئی اے۔ اسیں نماز دا حق ادا نہیں کردے۔ ہر سجدہ جہیڑا دل نال تے ہنجواں نال ہووے معراج کرادیندا اے۔ پروین سجل دی شاعری انج ای اے جیوین رب دا ذکر کیتا جا رہیا ہووے۔ ساڈی ایہہ ریت بن گئی اے پئی اسیں دور جان والیاں نوں یاد کردے آں تے نیڑے بیٹھیاں ول ویکھدے وی نہیں۔ سانوں چاہیدا اے کہ جو ساڈے کول اے اوہدی تعریف ہونی چاہیدی اے۔ سانوں ایہہ روایت ختم کرنی چاہیدی اے۔ سانوں قبراں تے پھُل چڑہان دی بجائے جیندیاں نوں پھُل پیش کرنے چاہیدے نیں۔ اوہناں آکھیا کہ اج میرے تے بہت ساریاں نویاں گلاں کھلیاں۔ سجل دی شاعری سن کے لگا کہ ایہہ گلاں صرف اوہ ای کر سکدا اے جیہنے صبر دا روزہ رکھیا ہووے۔ جدوں تیک صبر دا روزہ نہیں رکھیا جاندا اودوں تیک اوہدے نال نہیں ملیا جا سکدا۔ ہر اوس گل نوں چھڈنا چاہیدا اے جیہڑی تکلیف دا باعث ہووے۔ ساڈا وتیرہ اے کہ ساڈا گھر بچ جائے بھاویں پورا پنڈ سڑ جاوے۔ جس دن اسیں اپنا رویہ بدل لیا اوس دن دنیا وی جنت بن جاوے گی۔ ایس توں بعد اوہناں اک نظم پروین سجل دی نظر کیتی۔

کہو سجل یہ شاعری نہیں

ہم اپنے دکھوں کی زکوٰۃ نکالتے ہیں

تم جو خالی کشکول لئے

دل کی گلیوں میں پھرتے ہو

کیا آنسؤں کو سکوں سے کم جانتے ہو

 ایس توں بعد اقبال قیصر ہوراں پرویں سجل دی شاعری تے گل بات کیتی۔ اوہناں آکھیا کہ میں پروین نوں اینی دیر دا جاننا ہاں کہ میں جاندا ہی نہیں۔ پروین دی شاعری پڑھ کے لگدا اے کہ اسیں بابا فرید دی شاعری دے نظام توں باہر نہیں آئے۔ پروین نے اپنی شاعری وچ صاحب دا ستعمال کیتا اے تے اوہ بہت توجہ منگدا اے۔ سانوں دوزباناں ملدیاں نیں۔ اک درگاہ دی تے اک دربار دی زبان۔ صاحب دی تشریح مختلف صوفیاں کیتی۔ صاحب دی علامت درگاہ توں شروع ہوندی اے تے دربار کدی نہیں جاندی۔ اسیں ایس گل نوں جاندے آں کہ اک پاسے عاشق تے دوجے پاسے قیدو اے۔ صاحب دا لفظ ایس گل دا اُچارن کردا اے کہ بابا فرید دا نظام اجے تیک چل رہیا اے۔ یوسف سندھی ہوراں گل بات کردیاں آکھیا کہ میں پنجابی سنگت پاکستان کا شکر گزار ہوں کہ مجھے دعوت دی گئی۔ پنجابی اس خطے کی سب سے بڑی زبان ہے اور دکھ کی بات ہے کہ بچے کی مادری زبان میں تعلیم کی طرف آپکا پتہ نہیں کیوں دھیان نہیں ہے۔ سندھ میں میٹرک تک تعلیم سندھی میں ہے۔ اور یہاں بھی ایسا ہونا چاہیئے۔ پنجابی بہت امیر زبان ہے۔ یہ سارے صوفیا   کی زبان ہے۔ اور کتنی افسوسناک بات ہے کہ انکی زبان سکولوں میں نہیں پڑھائی جاتی۔ آپکو چاہیئے کہ اپنی زبان کی طرف توجہ دیں۔ سندھی ادبی سنگت 1956 سے کام کر رہی ہے اور اسکی 115 شاخیں ہیں۔ سندھی زبان تحریک کی سندھی ادبی سنگت نے رہنمائی کی ہے۔ پنجابی سنگت کو بھی ایسا کرنا چاہیئے۔ مجھے خوشی ہے کہ یہ منظم طریقے میں ہو رہی ہے۔  اوہناں جئے سندھ جئے پنجاب دا نعرہ لایا۔ یوسف پنجابی ہوراں آکھیا کہ اج سندھی اجرک ٹوپی دا دیہاڑ اے تے پنجابی سنگت پاکستان ولوں مبارکباد دتی جاندی اے۔ تے اگلے سال 4 دسمبر توں پگ دا تے پنجاب دا کلچر ل ڈے منایا جاوے گا۔ ایس توں بعد شفیق سلیمی ہوراں آکھیا کہ میں 25 ورہیاں دا پرواس کٹ کے آیا ہاں تے بہت سارا پانی پُلاں تھلوں لنگھ گیا اے۔ اک باوقار خاتون دی باوقار شاعری سنن نوں ملی اے۔ ایس توں بعد محترمہ تسنیم تصدق صاحبہ حلقہ تصنیف ادب ولوں مبارکباد دتی تے آکھیا کہ میں کوئ 12/ 13 ورہیاں توں ادب نال منسلک آں تے جدوں میں آئی سی تے میرے اندر اک ٹُٹ پھُٹ لگی ہوئی سی۔ پہلی واری اک مشاعرے وچ میری پروین سجل نال ملاقات ہوئی تے میں ایہناں دی شاعری سنی۔ ایہہ پنجابی سنگت پاکستان دا بہت وڈا کم اے کہ اوہناں اک عورت نوں ایہہ مقام دتا تے اوہدے لئی اک پروگرام رکھیا۔ اوہناں نے کہیا کہ جہدے کول جیڈا وڈا ظرف ہووے گا اوہ دوجے نوں اوہدے نال ای ماپے گا۔ اوہناں دسیا کہ حلقہ تصنیف ادب دے سیکرٹری مینوں اک واری آکھیا سی کہ پروین سجل اک دن صوفیاں ورگی شاعری کرن گیاں۔ تے اج اوہ دن میں ویکھ لیا اے۔  اوہناں دسیا کہ پروین سجل مینوں اوس دکھ توں وی اپنیاں گلاں نال نجات دت جہیڑا میں کئی ورہیاں توں اپنے پُتر دے گواچن نال مسلسل جر رہی ساں۔ ایس توں بعد تسنیم کوثر ہوراں آکھیا کہ پروین سجل اک بہت خوبصورت انسان اے تے ایہہ میری خوش قسمتی اے کہ مینوں ایس پروگرام وچ آن دا موقع ملیا۔ ایہناں دی شاعری بہت سوہنی اے تے میریاں دعاواں ہر قدم تے پروین سجل دے نال نیں۔ پروین سجل ہوراں آکھیا کہ بظاہر میں قد وچ وڈی آں پر اینی وڈی نہیں جنا پنجابی سنگت پاکستان نے مینوں بنا دتا اے۔ اوہناں آکھیا کہ ایہہ میرے مرشد دا کرم اے تے اوہناں دیاں جُتیاں دا صدقہ اے اج میں جو وی آں۔ میں نہ زیر، نہ زبر نہ پیش آں۔ ایس توں بعد اجلاس دی صدر شہناز مزمل ہوراں گل بات کردیاں آکھیا کہ مینوں بوہت خوشی اے کہ مینوں ایس پروگرام وچ بلایا گیا۔ اوہناں پنجابی سنگت پاکستان نوں مبارکباد دتی تے تے پنجابی سنگت دے کم دی سلاہنا کیتی۔ اوہناں دسیا کہ پروین سجل دے نال میرا تعلق بہت پرانا اے تے تے بطور صحافی تعلق ہور وی پرانا اے۔ پروین دے کلام وچوں مینوں شروع توں ای تصوف دا رنگ نظر آیا تے میرا ایہناں دے نال بہت ای احترام تے محبت دا تعلق بنیا۔ ہولی ہولی ایہہ ظاہر ہویا کہ پروین کس قسم دا کلام کہندیاں نیں تے اج تے کمال ای ہوگئی۔ اوہناں آکھیا کہ عشق تماشہ تے سب دے اندر ای ہوندا اے پر ایہنوں کوئی کوئی ای سمجھدا اے تے ایہدا مزہ کوئی کوئی ای ماندا اے۔ پروین اپنے آپ وچ ڈبی تے عشق تماشہ ہویا جہدے نال سانوں ایڈی سوہنی شاعری سنن نوں ملی۔ مینوں ایہناں دی شاعری سن کے ہمیشہ ای انج لگا کہ ایہہ گل میں کہنا چاہندی ساں پر پروین کہہ گئی۔ اصل گل اوہ ہوندی اے جیہڑی دل نوں چھو جائے۔ پروین اپنے سارے کردار بہت خوبی نال نبھا رہی اے۔ اوہناں آکھیا کہ سارے لوکاں نے بوہت سوہنیاں گلاں کیتیاں۔ پروین اج جس مقام تے ہے اوہ مقام کسے بندے دا دتا ہویا نہیں اے بلکہ رب دا دتا ہویا اے۔ اوہناں آکھیا کہ خواتین نوں ساڈے معاشرے وچ اوہ مقام نہیں دتا گیا جیہڑا اوہناں دا حق ہوندا اے۔ خواتین نوں ساڈے معاشرے وچ ہمیشہ ای ڈی گریڈ کیتا گیا اے۔ جدوں خواتین مرداں نوں تسلیم کردیاں نیں تے مرد کیوں نہیں عورتاں نوں تسلیم کردے۔ اخیر تے اوہناں پروین سجل دی نظر اک بند کیتا ۔

کر میرے نال اوہ چال گیا

اوہ عشق دا دیوا بال گیا

میں عشق دا دیو چا بیٹھی

اوہ میرا لوں لوں بال گیا۔

یوسف پنجابی ہوراں اجلاس دے اخیر تے سارے پروہنیاں دا آن تے شکریہ ادا کیتا تے آکھیا کہ اسیں جینڈر بیلنس دے قائل آں تے میں پنجابی سنگت پاکستان دی سیکرٹری شپ چھڈن نوں تیار آں جے کوئی عورت ایس ذمہ داری نوں سنبھالنا چاہندی اے۔

صدر                                  سیکرٹری                                   جوائنٹ سیکرٹری